Эрдўғон Туркияда Uber такси сервиси тақиқланганини эълон қилди

Uber такси хизмати Туркияда тақиқланди. Бу ҳақда мамлакат президенти Ражаб Тоййиб Эрдўғон маълум қилди, дея хабар бермоқда Daily Sabah.

«Uber’нинг Туркиядаги бизнеси тамом бўлди. У энди йўқ», — деди Эрдўғон. Унинг таъкидлашича, Туркиянинг ўз такси тизими бор ва қандайдир хусусий ташиш хизмати турк таксистларининг бизнесини вайрон қилишга ҳеч ким йўл қўймайди.

Uber 2014-или Туркияда фаолият бошлаганидан сўнг мамлакатдаги анъанавий такси ҳайдовчилар норозилик билдирган, нохолис рақобатдан шикоят қилган эди. Мамлакатда фақат 5 минг ҳайдовчигина Uber тизимида ишларди, холос.

Туркия пойтахтида 17 мингдан зиёд расмий сариқ такси мавжуд бўлиб, у ҳам шаҳар транспорт тизимининг асосларидан бири саналади.

Кузатувчиларнинг таъкидлашича, ушбу таксистлар томонидан кўрсатилаётган хизмат сифатининг пастлиги, хизмат ҳақининг ҳаддан зиёд юқорилиги каби омиллар Uber’га Туркияда муваффақият қозониш имконини бермоқда эди.

Айни вақтда, Туркия полицияси йил бошидан бери Истанбулдаги Uber ҳайдовчиларига 18,9 миллион лира (4 миллион доллардан кўпроқ) миқдорида жарима солган.

Uber’дан фойдаланишни тақиқлаган Туркия аввалроқ худди шундай қарор қабул қилган Болгария, Дания, Венгрия каби давлатлар қаторига қўшилди.

Апрель ойида Вена тижорий суди Австрия пойтахтида Uber такси хизмати фаолиятини тақиқлаган эди. Суднинг фикрича, Uber’нинг иш услуби Вена таксичилари учун ўрнатилган қоидаларига мувофиқ эмас.

2017 йилнинг сентябрида Лондонда ҳам Uber тақиқланган эди. Франция, Германия, Италия, Япония ва Тайванда ҳам сервис фаолияти чекланган.