Марғилонлик Ботир Ибрагимов «Odnoklassniki.ru» ижтимоий тармоғида ўзининг профили орқали диний экстремистик ва ақидапарастлик ғояларини тарғиб қилувчи турли видеороликлар ва аудиоёзувларни тарқатиб келган. Бу ҳақда «Дарё» мухбири Азизжон Эрматов хабар берди.
Жиноят ишлари бўйича Марғилон шаҳар суди томонидан Марғилон шаҳар «Қашқар» маҳалла фуқаролар йиғинида ўтказилган сайёр суд мажлисида Жиноят кодексининг 159-моддаси (Ўзбекистон Республикасининг конституциявий тузумига тажовуз қилиш) 1-қисми ва 244/1-моддаси (диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) 3-қисмига асосан Б.Ибрагимовга оид жиноят иши кўриб чиқилди.
Сайёр суд мажлиси давомида судланувчи ва гувоҳларнинг кўрсатувлари тингланди. Шунингдек, судланувчи истиқомат қилган маҳалла фуқаролар йиғини раиси ҳамда фаолларининг фикрлари эшитилди.
Қилмишидан чин кўнгилдан пушаймон бўлганини, халқ ва Президентдан кечирим сўраганини, унга маҳалла фаоллари кафиллик берганини эътиборга олиб, суд Б.Ибрагимовни қамоқдан озод қилиб, озодликни чеклаш билан боғлиқ жазо тайинлади.
Изоҳ (0)