Инновацион ривожланиш вазирлиги қошидаги Илғор технологиялар марказида Япония халқаро ҳамкорлик агентлиги (JICA) вакиллари билан учрашув бўлиб ўтди. Бу ҳақда «Дарё»га вазирлик матбуот хизмати маълум қилди.
Учрашувда Япония томонидан JICA бош директори ўринбосари, олий таълим ва ижтимоий таъминот гуруҳи директори Масато Кумагай, техник ва ижтимоий таъминот гуруҳи мутахассиси Чикако Сасаки, лойиҳаларни шакллантириш бўйича маслаҳатчи Азума Кендзиро, дастурлар мувофиқлаштирувчиси Малик Муҳитдинов, Инновацион вазирлик томонидан вазир ўринбосари Шерзод Шерматов, Илғор технологиялар маркази директори Шаҳло Турдиқулова ҳамда вазирликнинг халқаро бўлими бош мутахассиси Алишер Маҳкамов қатнашди.
Учрашув давомида Масато Кумагай Илғор технологиялар маркази фаолияти, улар олиб бораётган ишлар билан қизиқди. Марказ директори ўзи раҳбарлик қилаётган муассаса фаолияти, унинг тарихи, шаклланиши жараёни ҳақида сўзларкан, марказ фаолиятида сўнгги пайтлардан бўлган ижобий ўзгаришларни алоҳида таъкидлади.
Азума Кендзиро айни пайтда бир гуруҳ ўзбекистонлик ёш тадқиқотчиларнинг Японияда таълим олишлари бўйича лойиҳа ишлаб чиқилаётгани ҳақида маълумот берди.
JICA вакиллари Илғор технология марказининг фаолияти билан танишди. Марказнинг физика, кимё, биология, геология, геофизика, биофизика, биохимия лабораториялари уларда катта қизиқиш уйғотди.
Марказ ходимлари бир неча дақиқаларда суюқлик ва қаттиқ жисмларнинг юзга яқин кимёвий элементларини аниқлаб берувчи ускуналар, ер қимирлашини ва ер қатламининг сейсмик ҳолатини аниқловчи асбоблар,турли касалликларни ва касалликларга мойилликни эрта аниқлаш бўйича олиб борилаётган генетик изланишлар, фойдали қазилма бойликларни қидириш бўйича тадқиқотлар ҳақида сўзлаб берди.
Шерзод Шерматов Илғор технологиялар маркази халқаро ташкилотлар, жумладан, JICA билан ҳар қандай ўзаро манфаатли ҳамкорликка тайёр экани, марказнинг замонавий ускуналари, малакали мутахассислари турли халқаро лойиҳаларда иштирок этишга шайлигини таъкидлади.
Изоҳ (0)