Бугун, 14 май санасида ўзбек футболи афсонаси, «Ўзбекистон ифтихори» фахрий унвони ва «Шуҳрат» медали соҳиби Биродар Абдураимов 75 ёшни қаршилади. Шу муносабат билан ЎФА ўзбек футболи афсонасини қутлади.

Биродар Абдураимов 1943 йил 14 май куни Тошкент шаҳрида туғилган бўлиб, футболчилик фаолиятини 1960 йили Тошкентнинг «Пахтакор» клубида бошлаган. Кейинчалик Россиянинг «Спартак» ва ЦСКА клубларида ҳам бир муддат тўп сурган.

Абдураимов мураббий сифатида ҳам узоқ йиллар меҳнат қилиб, кўплаб шогирдларни тарбиялаб вояга етказган. У «Пахтакор», «Шаҳрихон», «Динамо», «Навбаҳор» каби клубларда ҳамда Ўзбекистон миллий терма жамоасида фаолият юритган.

Биродар Абдураимов «Пахтакор» футбол клубида 358 та ўйин ўтказиб, кўп ўйин ўтказиш бўйича рекорд соҳиби ҳисобланади.

Биродар Абдураимовнинг фарзандларини ҳам мухлислар кучли футболчи ва мураббий сифатида яхши танийди. Ҳозирда Азамат Абдураимов Ўзбекистон ўсмирлар терма жамоаси бош мураббийи сифатида ишлаб келмоқда. Жасур Абдураимов эса «Пахтакор» клубида ёрдамчи мураббий сифатида фаолият юритмоқда.