«Ўзбекконцерт» давлат муассасасининг қўшиқлар ва уларга ишланган видеоклиплар савиясини баҳолаш бўйича бадиий кенгаши навбатдаги йиғилишида Райҳон, Ҳулкар Абдуллаева, «Уммон» ҳамда «VIA Marokand» каби машҳур хонанда ва гуруҳлар ижодини танқид остига олди, деб хабар беради UZ24.
Бадиий кенгаш дастлаб Ўзбекистонда хизмат кўрсатган артист Райҳон Ғаниеванинг Ҳамдам Собиров сўзи, Жасур Бадалбоев мусиқаси асосида яратилган «Юрак» таронасига ишланган клипни томоша қилди.
Кенгаш аъзолари томонидан қўшиқ сўзлари мантиқан мукаммал эмаслиги ҳамда клипда айрим кадрлардан ножоиз фойдаланганлиги учун қайта ишлаш тавсия этилди.
«Ёшлар ушбу хонанданинг қўшиқларидан хушнуд бўлишини таъкидлаб, бу мавзудаги қўшиқларнинг сўзларига жуда жиддий ёндашиш кераклиги, шунингдек, унвонга муносиб қўшиқ куйланиши зарурлиги тушунтирилиб, ушбу қўшиқни намойиш этиш учун кадрларни тўғрилаш зарурлиги таъкидланди», — дейилади хабарда.
«Ниҳол» мукофоти совриндори Ҳулкар Абдуллаева томонидан «Дард» деб номланган қўшиқнинг сўзлари ва ижроси яхшилиги алоҳида таъкидланиб, лекин қўшиққа ишланган клипдаги кадрлардан ножоиз фойдаланганлиги боис, ушбу клипни қайта тўғрилаш тавсия этилди.
Сўзи ва мусиқаси Жасур Бадалбоевга мансуб, «VIA Marokand» гуруҳининг «Турист» қўшиғининг ҳам матни саёз эканлиги таъкидланди.
Ушбу қўшиқнинг матни мантиқ ва шеърият талабларига жавоб бермайдиган бачкана сўзлар асосида эканлиги ва клип кадрлари тушунарсиз ҳолатлар мавжудлиги кузатиш мумкин.
Қўшиқ сўзларида «Рам па папам тара тира тира там» сўзлари шеърият талабларига жавоб бермаганлиги туфайли рад этилиб, хонандалар қўшиқ сўзларини шоирлар билан қайта тўғирлаб, қайта топшириши мумкинлиги тавсия этилди.Сўнг «Уммон» гуруҳининг сўзи ва мусиқаси гуруҳ қаламига мансуб «Оқ гулим» деб номланган қўшиғи тингланди, бу қўшиқ ҳам сўзларининг мазмунсизлиги ҳамда клип кадридаги «алкоголли ичимликлар, ётоқхона саҳнасини олиб ташлаш» тавсия этилиб, ушбу ҳолатда эфирларга узатиш рад этилди. Муассаса масъулларига «Уммон» гуруҳи хонандаларини кейинги кенгашга таклиф этиш вазифаси топширилди.