АҚШнинг Нью-Йорк шаҳрида ўтказилаётган БМТнинг ўрмончилик бўйича Форумининг 13-сессиясида Ўзбекистон вакиллари фаол иштирок этмоқда, деб ёзади ЎзА.

Унда халқаро миқёсда ўрмончилик соҳасида амалга оширилаётган ишлар, 2017—2030 йилларга мўлжаллаган стратегик режаларнинг амалга оширилиши, грант маблағларини жалб этишга кўмаклашиш, ресурсларни баҳолаш ва мониторинг қилиш борасидаги масалалар муҳокама қилинмоқда.

Тадбир доирасида Ўзбекистон Ўрмон хўжалиги давлат қўмитасининг матбуот хизматидан маълум қилишларича, вакиллар Жаҳон банки вакили Гаро Батманиан билан учрашган. Мақсад Ўзбекистон ўрмончилик соҳасига 60 миллион доллар миқдорида кредит ажратилиши ва 10 миллион доллар миқдорида грант маблағлари йўналтиришни муҳокама қилиш эди.

Гаро Батманиан Яшил иқлим жамғармаси грант маблағларини ҳамда Глобал экологик жамғармалари маблағларини жалб этишга кўмаклашишга тайёр эканлигини билдириб, ўрмончиларни қўллаб-қувватлашини билдирди.

Туркия ўрмон ва сув хўжалиги вазирининг биринчи ўринбосари Акиф Узкалди бошчилигидаги делегация билан «FAO -Туркия ҳамкорлик» дастури доирасида Ўзбекистонда қарийб 5 миллион долларлик лойиҳани амалга ошириш борасида музокаралар олиб борилди. Натижада Ўзбекистондаги миллий боғлар инфратузилмаларини ривожлантириш ва иҳота ўрмонлар ташкил этиш лойиҳасини яратишга келишиб олинди.