Тошкент вилоятида маст ҳолда машина ҳайдаш билан боғлиқ 3500 дан кўпроқ қоидабузарлик аниқланди
Тошкент вилоятида маст ҳолда машина ҳайдаш билан боғлиқ 3500 дан кўпроқ қоидабузарлик аниқланди. Бу ҳақда «Дарё»га вилоят ИИБ ЙҲХ хабар берди.
«2017 йил давомида вилоят ҳудудида 29 та маст ҳолдаги ҳайдовчи иштирокида йўл-транспорт ҳодисалари содир этилиб, уларда 30 нафар шахс турли даражада тан жароҳатлари олган. 2018 йилда бу каби фожиали ҳолатларни барвақт аниқлаш ва олдини олиш мақсадида Тошкент вилояти ИИБ ЙҲХ хизмати ходимлари томонидан вилоят худудида бир қатор профилактик тадбирлар ўтказиб келинмоқда», — дейилади хабарномада.
Ўтказилган тадбирлар давомида ва ЙПХ ходимларининг кунлик хизмат фаолияти жараёнида йўл ҳаракати иштирокчилари томонидан жами 3559 та транспорт воситасини маст ҳолда бошқариш қоидабузарликлари аниқланиб, тегишлилиги бўйича белгиланган тартибда чора кўриш учун суд идораларига юборилган.
Ўз навбатида, ўтган даврда суд органлари томонидан 2907 та ишлар кўриб чиқилиб, 1743 та ҳайдовчиларга транспорт воситасини бошқариш хуқуқидан маҳрум этиш жазоси, 90 та ҳайдовчиларга маъмурий қамоқ жазоси, 61 та ҳайдовчиларга жарима жазолари тайинланган.
