АҚШда зирҳли автомобилдан бир неча қоп пул тушиб қолди

Индианаполис жануби-ғарбида (Индиана штати)  Brinks компаниясига тегишли зирҳли автомобиль ҳаракатланиб кетаётган вақтида орқа эшиги очилиб кетган, натижада ундан ичида доллар купюралари бўлган бир нечта қоп тушиб қолган, деб хабар берди «ТАСС».

«Ичида пул бор қоплар шоссега тушиб қолган. Содир бўлган воқеа қайсидир фильм воқеаларини эслатиб юборди: банкноталар ҳамма жойда учиб юрар, машиналар тўхтаб, унинг ичидан тушган одамлар эса пул йиғарди. Ҳар куни ҳам йўл бўйлаб учиб юрган пулларни кўравермайсан. Ҳақиқий тартибсизлик юзага келганди», — дейди полициячи Брок Маккой.

Маълумотларга кўра, зирҳли машина ўзини қувиб ўтаётган ҳайдовчилар огоҳлантирганидан кейингина тўхтаган.

Тахминларга кўра, йўлга тушиб қолган пулларнинг умумий қиймати 600 минг долларга тенг. Полиция йўлдаги пулларини йиғиб олишга улгурган мактаб автобуси ҳайдовчисини ва оқ пикапнинг тўрт нафар йўловчисини қидирмоқда.