«Халқлар дўстлиги» номи санъат саройи, майдон ва метро бекатига қайтарилди
3 май куни халқ депутатлари Тошкент шаҳар кенгашининг навбатдаги ўттиз олтинчи сессияси бўлиб ўтди. Сессияда депутатлар ваколатига доир масалалар, жумладан, Тошкент шаҳридаги баъзи географик объектларга ном бериш ва уларнинг номларини ўзгартириш масаласи кўриб чиқилди, дейилади шаҳар ҳокимлигининг хабарида.
Президент томонидан 26 апрель куни бўлиб ўтган видеоселектор йиғилишида ҳозирда «Истиқлол» санъат саройи деб номланиб келаётган саройга, унинг олд майдонига ҳамда «Бунёдкор» метро бекатига унинг аввалги «Халқлар дўстлиги» номини қайтариб қўйиш, шунингдек, Иккинчи жаҳон уруши даврида 14 фарзандни ўз бағрига олган Шомаҳмудовлар монументини жойига қайтариш мақсадида аввал Шомаҳмудовлар номи билан юритилган кўчага унинг номини қайта тиклаш юзасидан таклифлар берилган эди.
Шу муносабат билан бўлиб ўтган 36-сессияда:
- «Истиқлол» санъат саройига унинг аввалги номи — «Халқлар дўстлиги» саройи номини бериш;
- сарой олд майдонини «Халқлар дўстлиги» майдони деб юритиш;
- «Бунёдкор» метро бекатини «Халқлар дўстлиги» метро бекати деб қайта номлаш;
- Шайхонтоҳур тумани, «Обиназир», «Жарариқ» маҳаллалари ҳудудида жойлашган Тошкўча кўчасига Шоаҳмад Шомаҳмудов номини бериш;
Давлат раҳбарининг 2017 йил 24–25 ноябрь кунлари Жанубий Кореяга давлат ташрифи давомида берган таклифи ҳамда Вазирлар Маҳкамасининг 2018 йил 2 февралдаги йиғилиш баёни асосида Чилонзор тумани ҳудудида жойлашган Янги байналмилал кўчасига Сеул кўчаси номини бериш юзасидан кенгашнинг тегишли қарори қабул қилиниб, ижро учун йўналтирилди.
