24 апрель куни «Истиқлол» санъат саройида хонанда Дилдора Ниёзованинг «Кўзларингга нур бўлай» деб номланган уч кунлик концерт дастури бошланди. «Дарё» мухбири Севара Нишонова концертдан репортаж тайёрлади.
Концерт дастурини Ўзбекистон халқ артисти Фатҳулла Масъудов олиб борди. Дастур аввалида Дилдора Ниёзова мухлисларга мурожаат қилар экан, ижод қилаётганига 15 йил бўлган бўлса, шу вақт ичида бир неча маротаба санъатни тарк этиш ҳақида ўйлагани, аммо касбига меҳри туфайли ижодини давом эттираётганини таъкидлади.
«Шу пайтгача нимаики ният қилган бўлсам, ҳаммасига эришиб келяпман. Ҳаётда фақат яхши ният қилиб яшаш керак», — дейди хонанда.
Уч қисмдан иборат дастурда Дилдора Ниёзованинг анча олдин ижро этилган ва мухлислар қалбидан жой эгаллаган «Зардоли», «Ишонма», «Дарёларнинг бўйларида», «Сиз мени яхши билмайсиз» каби қўшиқлари ҳамда ҳали ҳеч қаерда янграмаган янги тароналари ҳам янгради. «Аслида», «Муҳаббат», «Ёнингда дўстинг бўлса», «Борсайдим», «Ўзингизни севинг аёллар» «Боламга насиҳат», «Юлдузингман», «Ҳабибинг» каби янги қўшиқлар томошабинлар томонидан илиқ кутиб олинди. Концертда қўшиқлар қисман жонли ижро этилди. Мухлисларнинг севимли қўшиқлари эса улар билан жўрликда ижро этилди.
Концерт дастури давомида Дилдора Ниёзованинг мухлислар билан самимий муносабатда бўлгани, уларга нисбатан ҳурмати таҳсинга сазовор. Хонанда ўзига гул ҳадя этаётган мухлисларига «Ўзингиздан орттириб, гул олиб келганингиз учун ташаккур» дея бир неча маротаба такрорлади. Шунингдек, аслида йўқ бўлган камчиликлар учун концерт иштирокчиларидан бир неча маротаба узр сўради.
Концертдаги танаффуслардан бирида хонанданинг акаси Нодирбек Ниёзов ҳам қўшиқ куйлади. Шунингдек, комик актриса Маҳфуза Шербоеванинг ҳазиллари ҳам томошабинларга кўтаринки кайфият бағишлади.
Хонанда «Боламга насиҳат» қўшиғини куйлаш учун саҳнага ўғли Жавоҳирбекни таклиф этди, шу пайтда саҳнага хонанданинг ўғли ва қизи қўлларида гулдаста билан кириб келди. Хонанда бу кутилмаган сюрприздан ҳайратга тушди. Шу пайтда Жавоҳирбек рус тилида «Мама» дея куйлаб, онасига меҳрини ифода этди. Дилдора Ниёзованинг ўзи ҳам ушбу қўшиққа жўр бўлди.
«Боламга насиҳат» деб номланган қўшиқ янграганида томошабинлар кўзида ёш қалқди. Қўшиқда она фарзандига оилада отанинг ўрнини юксак эътироф этиб, ота дили оғриши фарзанд учун қиёмат эканлигини айтади, «Мендан кўпроқ отанг рози қилгин болам» дейди. Қўшиқ якунида хонанда онасига миннатдорчилик билдириб, таъсирланди ва йиғлаб юборди.
Дилдора Ниёзовани ҳақиқий маънода элга танитган «Ишонма» таронаси ижро этилаётганда зал «портлади». Мухлислар ўрнидан туриб рақсга туша бошлади ва хонандани гулларга кўмиб ташлади.
Хонанда янги концерт дастурида илк маротаба ҳинд тилида қўшиқ ижро этди. Ҳиндча рақс билан бойитилган композиция мухлислар томонидан илиқ кутиб олинди.
Концертда хонанда дизайнер Наримон Григорян томонидан яратилган уч хил либосда намоён бўлди. Либослар хонанда учун маҳорат билан танланган, образлар Ниёзованинг ўтган йиллардаги кўринишларидан фарқ қилади.
Ҳар бир таронага мос равишда маҳорат билан рақслар саҳналаштирилган. «Тошкент зеболари» ансамблининг шўх рақслари томошабинларга хуш кайфият бағишлади. Таниқли раққоса Муҳаббат Қурбонова ҳам ҳар бир рақсга ўзгача ёндашди, унинг чиқишлари олқишлар билан кутиб олинди.
Концертнинг асосий, муҳим жиҳати, дастурнинг тугаб қолганини ҳеч ким сезмай қолди, ҳеч ким концерт тугамасдан зални тарк этмади.
Изоҳ (0)