ОАВ: Туркия ўзининг олтин захираларини АҚШ Федерал резервидан олиб чиқиб кетди
Туркия Марказий банки 2017 йил давомида республиканинг барча олтин захираларини АҚШ Федерал резервидан олиб чиқиб кетди. Бу ҳақда Hurriyet газетасига таяниб, «ТАСС» хабар берди.
Таъкидланишича, АҚШда сақланаётган олтин ёмбилари сонини қисқартириш қарори Анқаранинг Вашингтон билан бир қатор минтақавий ва икки томонлама мавзулардаги муносабатларнинг ёмонлашуви фонида қабул қилинган.
Федерал резервдан олтинларни тизимлаштирилган тартибда олиб чиқиб кетиш 2017 йилда бошланган, ўша вақтда АҚШда 28,7 тоннага яқин қимматбаҳо металл сақланган.
2016 йил маълумотларига кўра, АҚШ Федерал резервида сақланган Туркиянинг олтин захиралари 28 минг 689 килограммни ташкил этган. Марказий банк ҳисоботларида келтирилишича, мамлакат олтин захирасининг умумий ҳажми 564,6 тоннани ёки 20 миллиард доллар эквивалентга тенг.
Қўшма Штатлардан олиб чиқилган олтин қисман Туркияга қайтарилган ва Европадаги, хусусан, Буюк Британиянинг Марказий банки ва Швейцарияда Халқаро ҳисоб-китоблар банкига сақлашга топширилган.
