Сноуден қаршилик руҳи учун Дуровни мақтади

Америка махсус хизматларининг собиқ ходими Эдвард Сноуден Telegram асосчиси Павел Дуровни мессенжерни Россия ҳудудида блоклаш бўйича позицияси учун мақтади. У ўз фикрини Twitter’да билдирди.

Сноуден аввалроқ Telegram хавфсизлик тизимини танқид қилганлигини тан олди, бироқ Дуровнинг ҳукумат томонидан сервисга киришнинг чекланишига нисбатан реакцияси уни лол қолдирган.

«Дуровнинг Россия ҳукуматининг шахсий хабарларга киришни очиш ҳақидаги тоталитар талабида жавоби — унинг қаршилиги ва рад этиши — ахлоқ нуқтаи назаридан ягона тўғри жавоб ва ҳақиқий етакчиликни намоён этади», — деб ёзди у.

У, шунингдек, «Роскомнадзор» ҳаракатларини телбалик деб атади. Сноуден мазкур воқеани ёритаётган журналистларга Amazon ва Google расмийлар талабини бажариб, уларни қўллаб-қувватласа, бу цензура акти бўлишини маълум қилди.