«Катта еттилик» мамлакатлари Россияни Скрипал иши бўйича саволларга жавоб беришга чақирди

«Катта еттилик»га (G7) кирувчи мамлакатлар Россия ҳукуматини разведка бошқармаси собиқ полковниги Сергей Скрипал ва унинг қизи Юлиянинг Солсберида заҳарланиши бўйича саволларга жавоб беришга чақирди. Талабнома «еттилик» ташқи ишлар вазирлари учрашуви якунлари бўйича қабул қилинган баёнотга киритилган, деб ёзади «Газета.ru».

«Бирлашган Қироллик G7 иштирокчиси бўлган мамлакатларни батафсил хабардор қилди (Солсберидаги ҳодиса ҳақида). Ҳужум учун Россия жавобгар эканлиги ҳақидаги Буюк Британия нуқтаи назарига қўшиламиз. Буюк Британиянинг қонуний саволларига жавоб беришдан бош тортиб келаётган Россияни қоралаймиз… Россияни Солсберидаги ҳодисага дахлдор барча саволларга зудлик билан жавоб беришга чақирамиз», — дейилади баёнотда.

Шу жумладан, баёнотни тузувчилар Россия ҳукуматидан Британия расмийлари фикрича, Скрипал заҳарланган «Новичок» асаб-фалаж моддасини ишлаб чиқариш дастури ҳақидаги барча маълумотларни фош этишни талаб қилди.