Шавкат Мирзиёев Илҳом Алиевни Ўзбекистонга давлат ташрифи билан келишга таклиф этди
Ўзбекистон Президенти Шавкат Мирзиёев 12 апрель куни озарбайжонлик ҳамкасби Илҳом Алиев билан телефон орқали мулоқот қилди. Бу ҳақда Президент матбуот хизмати хабар бермоқда.
Давлат раҳбари Илҳом Алиевни куни кеча бўлиб ўтган Озарбайжон президенти сайловида ишончли ғалабага эришгани билан самимий табриклади.
Сайлов натижалари қардош озарбайжон халқи Илҳом Алиевни кенг қўллаб-қувватлаши ва унга улкан ишонч билдиришини, давлат раҳбарининг шахсий хизматлари ҳамда мамлакатда барқарорликни, изчил иқтисодий тараққиётни таъминлаш, халқаро нуфузини мустаҳкамлаш борасида амалга оширилаётган самарали сиёсатни юсак баҳолашини яна бир бор намоён этгани алоҳида таъкидланди.
Турли даражадаги фаол мулоқотлар икки томонлама ўзаро манфаатли ҳамкорликни янада кенгайтириб, уларни аниқ мазмун билан бойитишга хизмат қилгани қайд этилди.
Давлатлар раҳбарлари, шунингдек, Ўзбекистон – Озарбайжон кўп қиррали ҳамкорлиги, минтақавий ва халқаро аҳамиятга молик долзарб масалалар юзасидан фикр алмашди.
Мулоқот якунида Шавкат Мирзиёев Илҳом Алиевни Ўзбекистонга давлат ташрифи билан келишга таклиф этди.
Илҳом Алиев Шавкат Мирзиёевга самимий табрик ва эзгу тилаклар учун чуқур миннатдорлик билдириб, Ўзбекистонга ташриф билан келиш таклифини мамнуният билан қабул қилди.
Эслатиб ўтамиз, Илҳом Алиев 11 апрель куни Озарбайжонда ўтказилган навбатдан ташқари президент сайловида ғолиб бўлди. Марказий сайлов комиссиясининг дастлабки маълумотларига кўра, у овозларнинг 86,09 фоизини қўлга киритган.
