2017 йилда Наманганда ўтказилган «Тоза ҳаво» ойлиги тадбирлари доирасида 13000 автотранспорт воситаси кўрикдан ўтказилиб, қарийиб 676 та автомобиллардан ис гази ва тутун қалинлиги белгиланган меъёрдан ортиқлиги аниқланганди. Бу ҳақда «Дарё»га вилоят экология ва атроф-муҳитни муҳофаза қилиш бошқармаси жамоатчилик ва ОАВ билан алоқалар бўлими маълум қилди.
Жорий йилда ҳам «Тоза ҳаво» ойлигининг биринчи ва иккинчи босқичида вилоятда 13000 дона автоуловни текширувлардан ўтказиш режалаштирилган. Бунинг учун мутасадди ташкилотлар билан ҳамкорликда тегишли чора-тадбирлар олиб борилмоқда.
Автотранспорт воситаларидан чиқаётган зарарли чиқиндилар билан ифлосланишни камайтириш, бунда давлат назоратини кучайтириш ҳамда автомобилларга ёқилғи қуйиш, техник хизмат кўрсатиш шохобчалари, йўлларда атроф-муҳитни муҳофаза қилиш қоидаларига риоя қилиниши таъминлаш мақсадида ўтказиб келинаётган «Тоза ҳаво» ойлиги муҳим аҳамиятга эга. Шу боис ҳар йили икки босқичли ойлик доирасида тарғибот-ташвиқот тадбирлари билан бир қаторда автотраспорт воситаларидан атмосфера ҳавосига чиқаётган ис гази ва тутун миқдори ўлчанади.
Вилоят ҳокими фармойишига асосан ойликнинг биринчи босқичи 10 апрелдан 10 майгача ўтказилиши белгиланди. Тасдиқланган чора-тадбирларга мувофиқ ишчи гуруҳ томонидан Поп ва Норин туманларидаги «Наманган» ва «Чўжа» мунтазам йўл-патруль хизмати масканлари ҳамда марказий кўчаларда ҳам кўриклар ўтказиш режалаштирилган.
Изоҳ (0)