Францияда қирувчи самолёт тасодифан заводга бомба ташлади

Францияда Mirage 2000 қирувчи самолёти тасодифан заводга бомба ташлади. Бу ҳақда «РИА Новости» хабар берди.

Ҳодиса 10 апрель куни Луара департаментида юз берган. Франция ҳарбий-ҳаво кучларининг иккита самолёти Ножан-сур-Верниссон аҳоли пункти устидан учиб ўтаётган вақтда, улардан бири бомбасини тушириб юборган. Бомба Faurecia компаниясига тегишли завод устига бориб тушган. Оқибатда икки киши жароҳатланган.

Франция ҳарбий-ҳаво кучлари вакилининг сўзларига кўра, заводга тушган бомба машғулотлар учун мўлжалланган ва унда портловчи модда бўлмаган, уни Реймс яқинидаги полигонга ташлаш режалаштирилган эди. Ҳолат юзасидан текширув олиб борилмоқда.