АҚШда Тошкент ва Сиэтл ўртасида биродарлик алоқалари ўрнатилганлигининг 45 йиллиги нишонланди

Тошкент шаҳар ҳокимияти делегацияси Тошкент ва Сиэтл ўртасида биродарлик алоқалари ўрнатилганлигининг 45 йиллиги ҳамда Сиэтлда Наврўз байрамини нишонлашга бағишланган тадбирларни нишонлашда иштирок этиш учун АҚШга келди. Бу ҳақда UZ24 хабар бермоқда.

Тантаналарда 400 дан ортиқ киши, хусусан, Сиэтл маъмурияти, Тошкент—Сиэтл биродар шаҳарлар ассоциацияси, Вашингтон университети, ўзбек диаспораси вакиллари, шаҳар аҳолиси иштирок этди.

Байрам тадбирлари доирасида ўзбек рақс гуруҳлари, мусиқачи ва ижрочилар томонидан маданий дастурлар, миллий либос кўргазмаси ҳамда Ўзбекистон билан боғлиқ фотоматериаллар намойиши бўлиб ўтди.

Тадбирга сўзга чиққан ассоциация вакиллари сўнгги йилларда Наврўз байрами Сиэтл шаҳрида оммалашганини таъкидлаб, буларнинг барчаси ассоциациянинг 45 йиллик фаолияти меваси эканини қайд этди. Сиэтл шаҳри кенгаши аъзоси Тереза Маскеда ўз нутқида ассоциациясининг фаолиятни ҳамиша қўллаб-қувватлашини билдириб, бу саъй-ҳаракатлар икки мамлакат халқлари ўртасидаги муносабатлар ҳамда маданий, маърифий ва ишбилармонлик алоқаларини мустаҳкамлашга қаратилганини эътироф этди.

Ўзбекистон томонидан делегация раҳбари, Тошкент шаҳар ҳокими ўринбосари Дилбар Нажмиддинова ва Ўзбекистоннинг Қўшма штатлардаги Фавқулодда ва мухтор элчиси Жавлон Ваҳобов сўзга чиқди. Делегация вакиллари Сиэтл шаҳрида истиқомат қилаётган юртдошлар билан ҳам учрашди. Улар билан Ўзбекистонни ривожлантириш ҳақида фикр алмашилди. Facebook, Amazon ва Microsoft компаниялари мутахассилари билан биргаликда Ўзбекистон дастурчилари учун малака ошириш курслари ва семинарлар ўтказиш имкониятлари муҳокама қилинди.

Музокаралар давомида Сиэтл шаҳрида Ўзбекистон ёшлар иттифоқининг бошланғич ташкилотини очиш тўғрисида қарор қабул қилинди. Иттифоқнинг Тошкент шаҳар кенгаши томонидан шу йилнинг сентябр ойигача диаспорага 1000 та ўқув ва бадиий адабиётлар тақдим этиладиган бўлди.

Ташриф доирасида Тошкент шаҳар ҳокимияти делегацияси Сиэтл шаҳар кенгаши йиғилишида ҳам иштирок эцҳди. Кенгаш раҳбари икки шаҳар ўртасида биродарлик алоқалари ўрнатилганлигининг 45 йиллиги муносабати билан расмий прокламацияни ўқиб эшиттирди.

Сиэтл вице-мэри Ранганатан билан ўтказилган учрашувда мезбон томонидан бошқа 22 та биродар шаҳар орасидан айнан Тошкент билан ҳамкорлик фаол мустаҳкамланаётганлиги қайд этилди.

Маълумот учун, Сиэтл МДҲдаги шаҳарлар орасида биринчи бўлиб Тошкент шаҳри билан биродар шаҳар мақомига эга бўлган.