Лутфихон Маллабоева 25 йил муқаддам Қирғизистоннинг Ўш вилоятидан Ўзбекистонга келган. Шу заминда олий маълумотли бўлиб, шифокор сифатида узоқ йиллар хизмат қилди, оила қурди, фарзанду набиралар кўрди. Бу ҳақда ЎзА хабар бермоқда.

Бироқ Ўзбекистон фуқароси паспортига эга эмаслиги унинг армони эди. Бугун Лутфихон опанинг орзулари ушалди, унга Ўзбекистон Республикаси фуқаролик паспорти берилди.

Шу куни Лутфихон опа сингари яна 8 киши фуқаролик паспортига эга бўлди.

Тошкент шаҳар ҳокимлигида шу муносабат билан ташкил этилган тадбирда турли вазирлик ва идоралар вакиллари, фуқаролар ва журналистлар иштирок этди.

— Оилам, фарзандларим ёнимда, тинч диёрда яшаяпман. Бир қарашда мендан бахтли аёл йўқ, — дейди Миробод туманидаги 1-оилавий поликлиника умумий амалиёт шифокори Лутфихон Маллабоева. — Шу заминда яшаб, уни жондан азиз билсам-да, фуқаролик паспортига эга бўлмаганим мени қийнар эди. Қариндошларим қўшни Қирғизистонда яшайди. Уларни йиллаб кўролмасдим. Хорижга чиқиш билан боғлиқ кўплаб муаммо ва қийинчиликлар бўлар эди. Ҳатто, ота-онамни сўнгги манзилга кузатаётганда ҳам вақтида етиб боролмаганим армон бўлиб қолди. Яратганга шукр, бугун фуқаролик паспортини қўлимга олдим, сайлаш, сайланиш ҳуқуқига эга бўлдим.