Америкада ухлаётган болаларни полга улоқтирган тарбиячилар ҳибсга олинди

Американинг Жанубий Дакота штатидаги болалар боғчасида ёш болаларнинг устидан кулган икки тарбиячи қўлга олинди. Бу ҳақда New York Post хабар бермоқда.

Суриштирув февраль ойи охирида Су-Фолсдаги болалар боғчасидаги тарбияланувчилардан бири ота-онасига зўравонликдан шикоят қилгандан сўнг бошланган. Полициячилар кузатув камераларидаги видеони кўздан кечирди.

Аниқланишича, 31 ёшли Тереза Галлахер ва 22 ёшли Кенеди Вендт кундузи ухлаётган болаларга ҳужум қилган. Улар болаларни кўтариб, уларни полга улоқтирган. Аёллар, шунингдек, уларни оёғи билан босиб, тарбияланувчиларнинг бошига урган, баъзан эса қўлларидан юқорига кескин тортган. Жабрланувчиларнинг барчаси уч ёки тўрт ёшда бўлган. Бу уларнинг соғлиғига қандай таъсир қилганлиги хабар қилинмади.

Ходимлар 30 март куни ҳибсга олинган. Галлахер ва Вендт 25 та зўравонлик ва вояга етмаганларга нисбатан шафқатсизлик ҳолатида айбланмоқда. Уларга қандай жазо қўлланиши маълум қилинмаган. Болалар боғчаси тарбиячилари ишдан бўшатилган.