Россия ва Ўзбекистон ўртасида атом энергиясидан тинчлик мақсадида фойдаланиш юзасидан ҳамкорлик бўйича ҳукуматлараро келишув кучга кирди. Бу ҳақда «РИА Новости» хабар бермоқда.
Келишув ўтган йил охирида Тошкентда «Росатом» корпорацияси бош директори Алексей Лихачёв ва Ўзбекистон Бош вазирнинг ўринбосари Нодир Отажонов томонидан имзоланганди.
Ҳужжатда Ўзбекистонда миллий инфраструктурани яратиш ва такомиллаштириш, атом энергетикаси соҳасида кадрлар тайёрлаш, мамлакатда АЭС ва тадқиқот реакторлари қуриш, шунингдек, уларнинг фаолиятини доимий кузатиб бориш ўзаро ҳамкорлик учун истиқболли йўналишлар сифатида белгиланган.
Ўзбекистонда уран конлари разведкаси, радиоактив изотоплар ишлаб чиқариш ва уларни саноат, тиббиёт ва қишлоқ хўжалигида қўллаш, илмий ва фундаментал тадқиқотлар борасида ҳамкорлик ҳам кўзда тутилган.
Изоҳ (0)