Навоий вилоятида суд олтин эвазига марихуана сотишга уринган уч эркакка нисбатан ҳукм чиқарди. Бу ҳақда ЎзА хабар бермоқда.
Шоҳбоз Дадашев, Мели Ирисов ва Анзур Насриев (исм-фамилиялар ўзгартирилган, ҳар қандай ўхшашлик тасодифий бўлиши мумкин) Тошкент вилоятида туғилиб ўсган, серфарзанд оила бошлиқлари. Улар илгари ҳам жиноий қилмишлари учун бир неча бор озодликдан маҳрум этилиб, айримлари жазони тўлиқ, баъзилари қисман ўтагандан сўнг, амнистия актига асосан қамоқдан чиқарилган эди. Аммо улар яна жиноятга қўл урди.
16 майида бўлиб ўтган Кармана туман судининг очиқ мажлисида уларга нисбатан ҳукм ўқилди.
Гап шундаки, Ш. Дадашев шериклари М. Ирисов ва А. Насриевлар билан 2016 йилнинг сентябрь ойидан 2017 йилнинг 21 январь кунига қадар учрашиб юриб, кўп миқдордаги «марихуана» гиёҳвандлик воситасини топиш, уни навоийлик мижозларига қимматбаҳо металл — олтин эвазига сотишни режалаштирган.
Ш. Дадашев ушбу «маҳсулот»ни Навоий шаҳрига етказиш учун пойтахтдаги автобекатда ишловчи Орзи Тешаевга «почта» тариқасида берган. У, ўз навбатида, юкни вилоятга киракашлик қилувчи автомашина ҳайдовчиси Умрзоқ Ғойиповга узатиб, уни маълум бир ҳақ эвазига мижозга етказишни тайинлаган. У. Ғойипов Навоийга келиб, талабгорнинг уяли телефонига қўнғироқ қилиб, «почта»ни олиб кетишини айтган. Шу пайтда ҳуқуқ-тартибот идоралари ходимлари томонидан жиноят устида қўлга олинган.
Суд тўпланган материалларни ўрганиб чиқиб, Ш. Дадашев, М. Ирисов ва А. Насриевларга нисбатан Жиноят кодексининг тегишли моддаларига асосан, узоқ муддатга озодликдан маҳрум этиш жазосини белгилади.
Изоҳ (0)