Адлия вазирлигида Литва Нотариуслар палатаси президенти билан учрашув бўлиб ўтди

Ўзбекистон Республикаси Адлия вазирлигида Литва Нотариуслар палатаси президенти Марюс Страчкайтис ва мазкур палата маслаҳатчиси Эгле Чаплинскен билан учрашув бўлиб ўтди. Учрашувдан мақсад Литванинг нотариат соҳасидаги тажрибаси ҳамда Ўзбекистонда мазкур йўналишга боғлиқ масалаларни муҳокама қилишдан иборат. Бу ҳақда Адлия вазирлиги матбуот хизматига таяниб, UzDaily хабар берди.

Ўзбекистон томони меҳмонларни Адлия вазирлигининг асосий фаолиятлари ва ушбу соҳада амалга оширилаётган ислоҳотлар билан таништирди.

Ўз навбатида, Марюс Страчкайтис мазкур учрашув ташкиллаштирилгани учун миннатдорчилик билдирди ва яқин келажакда Ўзбекистон Халқаро нотариатлар кенгашига аъзо бўлишини тилади.

Марюс Страчкайтис Ўзбекистонда нотариуслар тизимини такомиллаштиришда ёрдам кўрсатишга ҳамда ушбу соҳадаги мамлакат тажрибаси билан танишиш учун Ўзбекистон делегациясини Литвада қабул қилишга тайёрлигини билдирди.