Буюк Британияга сафар қилган Ўзбекистоннинг етакчи исломшунос ва шарқшунос олимларидан иборат делегация Лондон шаҳрида жойлашган Ислом маданияти марказида учрашув ўтказди, деб хабар берди ЎзА.
Тадбирда Буюк Британиянинг Лордлар палатаси аъзоси, лорд Муҳаммад Илтаф Шайх, Ислом маданияти маркази директори доктор Аҳмад Дубаён ва ислом маданияти марказининг илмий ходимлари иштирок этди.
Учрашув қатнашчиларига Ўзбекистонда ижтимоий-иқтисодий ўзгаришлар, диний-маърифий соҳадаги туб ислоҳотлар ҳақида батафсил маълумот берилди.
Ислом маданияти маркази директори доктор Аҳмад Дубаён Ўзбекистонда амалга оширилган ишларнинг аҳамиятига тўхталиб ўтди. «Ўзбекистон ҳамиша бизнинг ёдимизда. Имoм Бухорий, Имoм Термизийдек буюк зотлар ўзбек заминида тарбия топган. Имoм Бухорийнинг асарлари бўлмаганида бугун бизнинг марказларимиз ҳам бўлмас эди. Биз ҳамиша бу улуғ зотлар ҳаққига дуо қиламиз. Ўзбекистоннинг зиёрат туризми соҳасидаги салоҳияти жуда ҳам юқори. Яқин орада Хитойдан то Америкагача – бутун дунё мусулмонлари Ўзбекистонга оқиб келади», — деди Аҳмад Дубаён.
Учрашувда Ислом маданияти марказида Самарқанд, Бухоро, Хива каби қадимий ва бетакрор шаҳарлар, ноёб тарихий обидалар ҳақида фотокўргазма, буюк алломалар ҳаёти ва илмий мероси ҳақида маърузалар ташкил этиш юзасидан келишувга эришилди.
Изоҳ (0)