Ўзбекистоннинг Жанубий Кореядаги элчихонаси фахрий консули, Evergreen Motor Group раиси Ким Чанг Кён бошчилигидаги делегация мамлакатда меҳмон бўлиб турибди. Ташриф доирасида пойтахтдаги Ёшлар ижод саройида Ўзбекистон ва Жанубий Корея ишбилармон доираларининг бизнес-форуми ўтказилди, дея хабар беради ЎзА.
Савдо-саноат палатаси, Ёшлар иттифоқи ҳамда Тошкент шаҳар ҳокимлиги ҳамкорлигида ташкил этилган тадбирда икки мамлакатнинг иқтисодиёт, инвестиция, савдо-саноат, туризм, қурилиш, логистика, машинасозлик, АКТ, энергетика, электротехника, қишлоқ хўжалиги, озиқ-овқат, кимё ва енгил саноати, соғлиқни сақлаш, тўқимачилик каби соҳалар учун масъул вазирлик ва идоралари, фирма ва компанияларининг 300 дан зиёд вакили иштирок этди.
Бизнес-форумда Савдо-саноат палатаси раиси Адҳам Икромов, Жанубий Кореянинг мамлакатдаги Фавқулодда ва мухтор элчиси Квон Ён У ва бошқалар икки давлат раҳбарларининг учрашувларида эришилган келишувлар натижасида Ўзбекистон билан Жанубий Корея ўртасида савдо-иқтисодий, инвестициявий ҳамкорлик янги поғонага кўтарилганини таъкидлади.
Бугунги кунда мамлакатда Жанубий Корея сармояси иштирокида тузилган 460 дан ортиқ корхона фаолият юритмоқда. Ўзбекистонда Кореянинг 75 компанияси ўз ваколатхонасига эга. Ушбу мамлакатнинг Ўзбекистон иқтисодиётига жалб этган инвестициялари ҳажми 7 миллиард доллардан ошади. Жанубий Кореянинг Марказий Осиё давлатлари билан маҳсулот айланмаси ҳажмининг аксарият қисми мамлакат улушига тўғри келишини алоҳида таъкидлаш жоиз.
Форумда меҳмонларга мамлакатимизда инвесторлар учун яратилаётган шароит, хусусан, эркин иқтисодий ва кичик саноат зоналаридаги имкониятлар, солиқ ва божхона имтиёзлари ҳақида маълумот берилди.
— Ўзбекистон Жанубий Кореянинг Марказий Осиёдаги муҳим савдо шеригидир, – деди Ким Чанг Кён. — Бу савдо-саноат, сайёҳлик, қурилиш материаллари, электротехника ва бошқа кўплаб соҳаларда ўзаро манфаатли ҳамкорлик ривожланиб, янада мустаҳкамланаётганида ҳам намоён бўлмоқда. Форум доирасида Hyundai компаниясининг енгил автомобиллари учун эҳтиёт қисмлар йиғиш ва табиий ресурсларни қайта ишлаш соҳасидаги ҳамкорлик истиқболларини муҳокама қилдик.
Анжуман доирасида B2B шаклидаги мулоқотлар ҳам ташкил этилди.
Изоҳ (0)