Эски «Абу Сахий» ва янги Тошкент савдо маркази ҳақида ажойиб рақамлар

«Ўзбекистон 24» телеканалидаги «Ахборот 24» информацион дастурининг 6 март сонида номи Тошкент садво маркази деб ўзгартирилган собиқ «Абу Сахий» савдо мажмуаси ҳақида лавҳа эфирга узатилди. Унда эски мажмуа ва янги савдо марказ фаолиятига доир бир қатор рақамлар келтирилди.

«Абу Сахий» савдо мажмуаси фаолият юритган даврда дўконлар ижарасидан тушган маблағ 381 миллион сўмни ташкил қилган бўлса, Тошкент савдо маркази фаолиятини бошлаганидан буён бу кўрсаткич 1,9 миллиард сўмга етган — орадаги фарқ деярли беш мартага кўп.

Бошқа турдаги ижаралардан тушган маблағ олдин 307 миллион сўмни ташкил этган бўлса, ҳозирда бу кўрсаткич 1,3 миллиард сўмга етган — орадаги фарқ тўрт баробарни ташкил этмоқда.

Мажмуада рекламалар жойлаштириладиган майдонлар ҳам кенгайтирилган бўлиб, ундан олинадиган фойда оз эмас, кўп эмас 30 баробарга ошган («Абу Сахий»да 4 миллион сўм бўлган, Тошкент савдо марказида — 120 миллион сўм).

Автотураргоҳ ва бошқа хизмат кўрсатиш турларидан тушадиган даромад ҳам деярли икки баробарга ортган («Абу Сахий»да 1,2 миллиард сўм бўлган, Тошкент савдо марказида — 2 миллиард сўм).

Юкларни сақлаш хоналари ижараси учун тушум 70 миллион сўмдан 460 миллион сўмга, яъни, 6,5 баробарга ошган.

2017 йилда «Абу Сахий» савдо маркази фаолиятида божхона тўловларидан тушган фойда 82 миллиард сўмни ташкил этган бўлса, яқинда иш бошлаган Тошкент савдо мажмуасининг бу йўналиш бўйича олган даромади сўнгги уч ойнинг ўзида 53 миллиард сўмга етган — 2018 йил охирига қадар олинадиган фойда 212 милилард сўмга етиши прогноз қилинмоқда

2018 йилда савдо мажмуасида фаолият олиб бораётган тадбиркорлар сони яна 275 га ошиб, жами 2535 нафарни ташкил этмоқда.

2016—2017 йиллар давомида «Абу Сахий» савдо мажмуасида кўрсатилган хизматлардан олинган 439 миллиард сўм маблағ давлат фойдасига тушмай, аксинча, четга чиқиб кетган.

Жорий йилнинг ўтган икки ойи давомида экспорт натижасида Тошкент савдо мажмуаси томонидан давлат бюджетига 17 миллион АҚШ долларидан ортиқ маблағ туширилди. 2018 йилнинг якунига бориб, бу кўрсаткич 80 миллион долларга етиши прогноз қилинмоқда.