9—25 февраль кунлари бўлиб ўтадиган XXIII қишки Олимпиада ўйинларида Ўзбекистон шарафини икки спортчи ҳимоя қилади. Бугун — 4 февраль куни уларни Олимпиадага мезбонлик қилаётган Пхёнчханга кузатиш маросими бўлиб ўтди, деб ёзди МОҚ матбуот хизмати.
Ўзбекистонлик спортчилар фигурали учиш ва тоғ чанғисида медаллар учун кураш олиб боради. Фигурали учишда Миша Ге музга чиқса, тоғ чанғисида Комил Тўхтаев иштирок этади. Олимпиаданинг очилиш маросимида Ўзбекистон байроғини Комил Тўхтаев кўтариб чиқади.
Жуда хурсандман. Олимпиадага бориш учун шароит яратиб берган қишки спорт турлари ассоциациясига миннатдорчилик билдираман. Менга билдирилаётган ишончи оқлайман деб умид қиламан.Комил Тўхтаев, тоғ чанғичиси
Комил Тўхтаев Италия мезбонлик қилган халқаро мусобақада Олимпиадага йўлланма ютиб олганди. Миша Ге эса Финляндиядаги Жаҳон Чемпионатида муваффақиятли иштирок этиб, Олимпиада лицензиясига эга чиққан.
Спортчиларни кузатиш маросимида МОҚ бош котиби Жасур Матчонов иштирок этиб, эҳтимолий медаллар ташкилот томонидан рағбатлантирилишини айтиб ўтди. МОҚ биринчи вице-президенти Ойбек Қосимов эса келгусида қишки Олимпиада ўйинларига бўлган эътибор бундан анча катта бўлишини таъкидлади. Чунки Ўзбекистонда қишки спорт турларига тегишли бўлган алоҳида 4 та федерация иш бошлайди: хоккей, фигурали учиш, тоғ чанғиси, сноуборд ва кёрлинг.
Пхёнчхан Олимпиадасида ўзбекистонлик ҳакам Саодат Нуманова ҳам бор. У фигурали учиш баҳсларида ҳакамлик вазифасини бажаради.
МОҚ матбуот хизматининг хабар беришича, қишки Паралимпиадада Ёқутхон Холбекова чанғи пойгасида иштирок этади. Паралимпиада 8—18 март саналари оралиғида бўлиб ўтади.
Изоҳ (0)