Шаҳрихон туманидаги «Дарё» мобил мухбирининг маълум қилишича, «заправкалар ёпиқ, ҳамма шохобчаларда: ‘Бир-икки кун ишламаймиз’, деб тарқатиб юборишяпти». Тумандаги автомобилларга бензин ёқилғисини қуйиб берувчи шохобчаларда навбатлар юзага келишни бошлаган. Вилоят марказида ҳам вазият шундай.
Наманганда ҳам шу аҳвол. «Заправкаларда газ бор, лекин чеклов ўрнатилган — ҳар бир шохобчага куннинг маълум бир қисмида ишлаш ҳақида кўрсатма берилган. Нега бундай қилингани номаълум. Ҳайдовчилар эса қачон, қаерда газ сотилишини билмай, сарсон бўляпти. Шунинг учун ҳаммаёқда тартибсиз навбатлар пайдо бўляпти», — дейди вилоятдаги мобил мухбир.
«Дарё»нинг Фарғона вилоятидаги мобил мухбири сўзларига кўра, «газ заправкалар икки кун давомида ишламас экан». «Заправкадагилар шундай деди, сабабини айтишмади», — дейди мобил мухбир.
Андижон ва Намангандаги мухбирларнинг таъкидлашича, газ тўлдириш шохобчаларидаги муаммоли вазият ҳудуддаги йўловчи қатновига салбий таъсир кўрсатмоқда. «Одамлар кўчаларда Damas кутиб қолиб кетяпти, ўз манзилига қандай етиб олишни ҳам билмаяпти», — дейди Намангандаги мобил мухбир. Ижтимоий тармоқларда эса Андижонда Damas кутиб турган йўловчиларнинг суратлари эълон қилинган.
Бундан ташқари, Telegram’даги «Водий Бозор» каналида водий шаҳар ва туманларидаги газ қуйиш шохобчалари олдида юзага келган навбатларнинг суратлари эълон қилинган.
«Xabar.uz»нинг ҳудуддаги газ қуйиш шохобчаларига асосланиб хабар беришича, «газ етарли берилмаяпти», маҳсулотнинг чеклов билан сотилиши сабаби ҳам шунда. «Водий Бозор» каналида эълон қилинган маълумотга кўра, «Ангрендаги ремонт сабаб водийга газ берилмаяпти, бир-икки кунда ишлаб кетади». Бу хабарда Ангренда айнан нима таъмирланаётганига аниқлик киритилмаган.
Мазкур ҳолат юзасидан газ таъминотига масъул идора ва ташкилотлар ўзи ҳам ҳозирча бирор расмий баёнот билан чиқиш қилганича йўқ.
Изоҳ (0)