Жанубий кореялик таниқли актриса, ўзбекистонликларга «Сарой жавоҳири» сериалидаги Тангем роли билан танилган Ли Ёнг Э Ўзбекистоннинг Жанубий Кореядаги туризм элчиси бўлади. Бу ҳақда Ўзбекистон Туризмни ривожлантириш давлат қўмитаси раиси Азиз Абдуҳакимов ва Ўзбекистоннинг Жанубий Кореядаги элчиси Виталий Фен маълум қилди.

Халқаро пресс-клуб ва Бош прокуратура ҳузуридаги Ахборот-таҳлил мультимедиа маркази ҳамкорлигида «Ўзбек дипломатиясининг янги воқеълиги: Бурч, масъулият ва вазифалар» мавзусида анжуман бўлиб ўтди; тадбир 15 январь куни «Ўзбекистон 24» телеканали орқали намойиш этилди.

Анжуманда сўз олган Туризм қўмитаси раиси Азиз Абдуҳакимовнинг таъкидлашича, Президент Шавкат Мирзиёевнинг ташаббуси билан чет мамлакатларда Ўзбекистоннинг туризм элчиси — Тоурисм бранд Ambassador оф Узбекистан лавозими жорий этилмоқда. Бу лавозимга чет эллик машҳур сиёсий, маданий, спорт ва ишбилармон доиралари вакиллари тайинланади.

Мавзуга доир: Чет мамлакатларда Ўзбекистон туризм элчилари пайдо бўлади

Битта мисол келтиришимиз мумкин. Юртбошимиз Жанубий Кореяда ташриф билан бўлганларида, «Сарой жавоҳири» сериалининг машҳур юлдузи (Тангем) билан учрашган эди. Биз у билан музокараларни якунладик. У Ўзбекистоннинг Жанубий Кореядаги туризм элчиси сифатида фаолият олиб боришига келишиб олдик.

Азиз Абдуҳакимов, Ўзбекистон Туризмни ривожлантириш давлат қўмитаси

Ўзбекистоннинг Жанубий Кореядаги элчиси Виталий Феннинг таъкидлашича, туризм элчилари Ўзбекистонга ташриф буюраётган чет эллик сайёҳлар сонини оширишга катта ёрдам беради.

Тангемни Ўзбекистонда ҳамма кўрган, халқ уни яхши кўради. Сериалда бош ролни ижро этган актриса жуда машҳур. Биз уни туризм элчиси қилиб тайинлаяпмиз. У Кореяда Ўзбекистонга саёҳатларни тарғиб этиш билан шуғулланади. Биз шу туризм элчиси кўмагида мамлакатимизга Жанубий Кореядан келадиган сайёҳлар сонини камида 10 фоизга кўпайтирамиз. Умуман, Корея билан туризм соҳасида ҳамкорликни кенгайтириб, туристлар сонини уч баробар кўпайтирамиз.

Виталий Фен, Ўзбекистоннинг Жанубий Кореядаги элчиси

Эслатиб ўтамиз, Ўзбекистон Президенти Шавкат Мирзиёев 2017 йил ноябрида Жанубий Кореяга ташрифи давомида «Сарой жавоҳири» сериалида бош ролни ижро этган актриса Ли Ёнг Э билан учрашган эди.

Мавзуга доир: Шавкат Мирзиёев «Сарой жавоҳири» сериалидаги Тангем билан кўришди (фото)