Усмоновнинг Dilbar’и, Абрамовичнинг Eclipse’и, Дубай амирининг Dubai’и ва бошқалар: Дунёнинг энг катта яхталари (фотогалерея)

Boat International нашри дунёнинг 200 та энг узун яхталаридан иборат рейтингни эълон қилди. «Ведомости» рейтингнинг биринчи ўнта поғонасидан ўрин олган яхталар билан таништирди.

БАА амирлик оилаларидан бирига тегишли 141 метрли Yas ўнинчи ўринни эгаллади. 1978 йилда қурилган яхта 60 йўловчи ва 56 экипаж аъзосини сиғдира олади.

Тўққизинчи ўринда — «Еврохим» директорлар кенгаши раиси (Россия) Андрей Мельниченконинг буюртмаси билан ясалган Sailing Yacht A елканли яхтаси. Унинг узунлиги — 143 метр.

1865 йилда сувга туширилган 145 метрли El Mahroussa саккизинчи поғонада жойлашди. Ҳозирда у Миср ҳарбий-денгиз флоти тасарруфида бўлиб, президент яхтаси сифатида хизмат қилади.

147 метрли Prince Abdulaziz яхтаси Саудия Арабистони қироли Абдулла буюртмаси билан 1984 йилда қурилган. Уни ясаш 184 миллион долларга тушган. Интерьернинг ўзига хос жиҳатларидан бири — бош палубадаги катта лобби «Титаник» интерьерини такрорлайди.

Олтинчи ўриндаги Topaz яхтаси Prince Abdulaziz’дан 25 сантиметрга узунроқ. У 2012 йилда машҳур архитектор Тим Хэйвуд дизайни бўйича қурилган.

Уммон султони Қобус бин Саидга тегишли 155 метрли Al Saïd яхтаси — бешинчи ўринда. У вертолёт майдони, кинотеатр ва концерт залига эга.

Тўртинча ўринни, ОАВ маълумотларига кўра, USM Holdings эгаларидан бири Алишер Усмоновга тегишли 157 метрли Dilbar яхтаси эгаллади. У 40 нафар меҳмон ва 80 нафар экипаж аъзоси учун мўлжалланган. ОАВ уни тахминан 600 миллион долларга баҳоламоқда.

Катталиги бўйича дунёда учинчи — Дубай амири ва БАА бош вазири Муҳаммад ибн Рашид ал-Мақтумга тегишли 162 метрли Dubai яхтаси.

Иккинчи ўринда — Роман Абрамовичнинг буюртмаси билан 2010 йилда қурилган 162,5 метрли Eclipse яхтаси.

Сўнгги беш йилликнинг мутлақ рекордчиси эса 180 метрли Azzam яхтаси бўлди. Тахминларга кўра, у БАА қироллик оиласи аъзоси буюртмаси билан қурилган.