2017 йил 4 декабрда Бухоро вилоятининг Олот туманида New Silk Road Oil & Gas МЧЖ қўшма корхонаси томонидан амалга оширилаётган «Денгизкўл газ конденсати конининг (ГКК) Хўжасаят участкасини, Хўжадавлат ГККни ва Шарқий Олот ГККни ободонлаштириш» лойиҳаси доирасида Хўжасаят участкасидан табиий газ қазиб чиқариш ишлари бошланиши маросими бўлиб ўтди. Бу ҳақда «Ўзбекнефтгаз» матбуот хизмати хабар бермоқда. Бундан аввал эса мамлакатнинг табиий газга бой минтақаларида «зангори ёқилғи» қазиб чиқариш жараёнларини оптималлаштиришга қаратилган кенг кўламли ишлар амалга оширилди.
Ўзбекистон Республикасининг инвестицион блокларида геологик қидирув ишларини ўтказиш юзасидан «Ўзбекнефтгаз» АЖ ва Хитой миллий нефть компанияси (CNPC) ўртасида 2006 йил июнь ойида тузилган Битимни амалга ошириш натижалари бўйича Қоракўл инвестицион блокида янги Хўжасаят, Хўжадавлат ва Шарқий Олот газ конденсати конлари очилди.
Уларни ободонлаштириш ва саноат усулида фойдаланишга тушириш мақсадида томонлар ўртасида New Silk Road Oil & Gas МЧЖ шаклида қўшма корхона яратилган эди.
Ўзбекистон Республикаси Президентининг 2016 йил 14 октябрдаги Қарорига мувофиқ лойиҳанинг Техник-иқтисодий асосланиши (ТИА) тасдиқланди ва барча керакли имтиёзлар тақдим этилди.
Жорий йилнинг май ойида Хитой Халқ Республикасига давлат ташрифи давомида Президент Шавкат Мирзиёевнинг CNPC компанияси бошқарув раиси жаноб Вал Илин билан учрашуви ушбу лойиҳани амалга оширишни жадаллаштириш учун кучли туртки берди.
Хусусан, CNPC кафолати остида Хитой Банки билан қисқа муддатларда кредит Битими имзоланди. Жорий йил 30 май куни тамал тошини қўйиш маросими ўтказилди ва лойиҳани рўёбга чиқариш ишлари фаол босқичга ўтди.
Олти ой давомида 47 км магистрал газ қувури, 15,7 км шлейф газ қувури ўтказилди, Хўжасаят участкасини ободонлаштириш, 72 кишига мўлжалланган вахта шаҳарчасини барпо этиш ишлари якунланди, 2 та янги қудуқ бурғиланди, аввал бурғиланган учта қудуқ капитал таъмирланди, реал вақт тартибида табиий газ қазиб чиқаришни назорат қилиш учун замонавий автоматлаштирилган бошқариш пульти қурилди.
Яқин истиқболда эса қўшма корхона Хўжадавлат ва Шарқий Олот конларини ободонлаштириш, 8 та янги қудуқларни бурғилаш ва аввал бурғиланган учта қудуқни таъмирлаш ҳамда 43 км газ қувурини ўтказиш ишларини амалга оширишни режалаштирмоқда.
Лойиҳа тўлиқ амалга оширилиши натижасида экспортга жўнатиш учун ҳар йили 1,0 млрд. куб. метргача табиий газ қазиб чиқариш ва ички бозорда сотиш учун қарийб 6,5 минг тонна газ конденсатини ишлаб чиқариш таъминланади.
Изоҳ (0)