Коррупцияда айбланган саудиялик шаҳзодалар ва миллиардерларнинг кўпчилиги озодлик эвазига ўз маблағларининг бир қисмини давлатга беришга рози бўлди, деб ёзади «Газета.ru». Бу ҳақда валиаҳд шаҳзода Муҳаммад бин Салмон Ал Сауд The New York Times’га берган интервьюсида маълум қилди.
Валиаҳд шаҳзода журналистларга айтиб беришича, коррупция масаласи унинг мамлакатида жуда долзарб бўлиб турган. 2015 йилда ҳукумат «энг юқоридаги» порахўрлик ҳақида барча зарур далилларни йиғишга қарор қилган. Натижада қарийб 200 исм-шарифдан иборат рўйхат ҳосил бўлган.
«Биз уларга ўзимизда бор барча ҳужжатларни кўрсатдик, улар билан танишиб чиққач, уларнинг 95 фоизи судгача олиб бормасдан ҳал қилишга қарор қилди», — деди у.
Бу шуни билдирадики, улар озодлик эвазига ўз маблағларининг бир қисмини ёки уларга тегишли компаниялардаги улушини бериб юборишга тайёр. Коррупцияда айбланганларнинг яна 1 фоизи айбсиз деб эълон қилинди, 4 фоизи эса буни судда исботламоқчи.
Муҳаммад бин Салмон Ал Сауднинг ҳисоб-китобларига кўра, Саудия Арабистони ғазнасига жами 100 миллиард доллар келиб тушган.
Изоҳ (0)