Пол Маккартни, Элтон Жон ва Мадоннанинг автомобиллари Bonhams аукционида сотувга қўйилади

The Beatles гуруҳининг аъзолари Пол Маккартни ва Ринго Старр, шунингдек, қўшиқчи Элтон Жон ва Мадоннага тегишли бўлган автомобиллар декабрь ойида Лондондаги Bonhams аукционида сотувга қўйилади, деб хабар берди «ТАСС».

Энг қиммат лот дастлаб Маккартнига тегишли бўлган, 1964 йилда ишлаб чиқарилган Aston Martin DB5 ҳисобланади. Унинг дастлабки нархи 1,25—1,50 миллион фунтга (1,66—1,99 миллион доллар) баҳоланмоқда. Старрга тегишли 1966 йилда ишлаб чиқарилган Austin Mini Cооper ‘S’нинг нархи эса 90—120 минг фунт (119—159 минг долларга) атрофида.

Савдога қўйилган Bentley маркасидаги иккита автомобиль ўз вақтида Элтон Жонга тегишли бўлган. 1959 йилда ишлаб чиқарилган Bentley S1 Continental (530—662 минг доллар) машҳур сиёсатчи ва телебошловчи Алан Шугар сотиб олгунига қадар чорак аср давомида қўшиқчининг коллекциясида сақланган. 1960 йилги Bentley S2 Continental Flying Spur’дан эса (212—252 минг доллар) Элтон тез-тез фойдаланиб турган.

Шунингдек, кимошди савдосида қўшиқчи Мадонна ва кинорежиссёр Гай Ричи 2000 йилда никоҳ маросимига йўл олган Rolls-Royce Silver Cloud (1959 йилги) ҳам сотувга қўйилган. Унинг дастлабки нархи 795 минг—1,06 миллион долларни ташкил этади.