Британиялик стюардесса Люси Саржант ўзида самолётда учишдан қўрқиш ривожлангани учун British Airways авиакомпаниясини судга берди, деб хабар беради Evening Standard.
Стюардесса авиакомпаниядан 750 минг фунт миқдорида товон пули талаб қилмоқда.
Люсининг маълум қилишича, у 2013 йилда Лондондан Ослога учаётган Airbus A319 самолётининг двигателларидан бирида ёнғин юзага келгани ва оқибатда йўловчиларнинг саросимага тушганига гувоҳ бўлган. Учувчи парвоз бошланган Хитроу аэропортига қайтиш ҳақида қарор қабул қилган. Самолёт қўндирилганидан сўнг экипаж аъзолари ва йўловчилар шиширилган траплар орқали эвакуация қилинган.
Мазкур ҳодисадан сўнг Саржант уйқу бузилиши, хавотирланиш, қўрқинчли тушлар ва самолётда учишдан қўрқиш каби муаммоларга дучор бўлди.
Люси охир-оқибат ишга чиқди, бироқ 2016 йилда у яна бир авариявий ҳолатнинг гувоҳи бўлди. Рейс вақтида самолёт салони токсик тутун билан тўлди. Шундан сўнг Саржант ўз касби билан бир умрга хайрлашди.
Хабарда қайд этилишича, авиакомпания айбловнинг асосли эканлигини тан олган, ҳозирда товон пулининг миқдори муҳокама қилинмоқда.
Изоҳ (0)