АҚШ бошчилигидаги халқаро коалиция вакили полковник Райан Диллон Россия мудофаа вазирлигининг ИШИД билан ҳамкорлик борасидаги айбловлари исботсиз ёлғон эканлигини таъкидлаб ўтди. Бу ҳақда «РИА Новости» хабар бермоқда.
«Исботсиз, ноаниқ ва тўлалигича ёлғон», — деди Диллон, бунга изоҳ бераркан.
Диллоннинг фикрича, Россия шу йўл билан Сурияда дуч келган қийинчиликлардан жаҳон ҳамжамиятини чалғитмоқчи.
«Мен баъзи расмлари видеоўйинлардан олингани ҳақидаги хабарларни кўрдим», — деди Диллон Бағдодда ўтган брифингда.
Муқаддам мудофаа вазирлиги «Қўшма Штатлар томонидан ИШИДнинг жангга қодир отрядлари таъминланаётганининг рад этиб бўлмас далиллари»ни эълон қилган эди. Аммо суратлардан бири AC-130 Gunship Simulator: Special Ops Squadron мобил ўйинидан олинган скриншот экани маълум бўлди. Матбуотда бу борада хабарлар чиққанидан сўнг Россия мудофаа вазирлиги ижтимоий тармоқлардан ушбу суратларни ўчириб ташлади.
Бироздан сўнг мудофаа вазирлиги бундай ахборотнинг чиқиб кетиши билан боғлиқ ҳодиса ўрганилаётганини маълум қилди ва, таъкидланишича, «рад этиб бўлмайдиган далил» бўла оладиган бошқа суратларни чоп этди.
Изоҳ (0)