Кумуш Раззоқованинг продюсери Владимир Барамиков вафот этди

«Ўзбеккино» миллий агентлиги ва Ўзбекистон киночилар бирлашмаси бастакор Владимир Барамиков 68 ёшида вафот этганини маълум қилди. Бу ҳақда 1News хабар бермоқда.

Дафн маросими эртага, 15 ноябрь куни соат 12:00 да бўлиб ўтади.

Мусиқачи, бастакор, овоз режиссёри, продюсер, UNA Records студияси бош директори Владимир Барамиков 1949 йил 3 май куни Тошкентда туғилган. 1974–1978 йилларда Қарши давлат мусиқа таълим даргоҳининг мусиқа назарияси синфини, 1985–1991 йилларда Тошкент давлат маданият институтининг оммавий байрамлар режиссёри факультетини тамомлаган.

1978 йили «Ўзбекконцерт» концерт бирлашмасига ишга таклиф қилинган. У ерда «Садо» ансамблини яратган.

Жамоа таркибига Кумуш Раззоқова, Азиза Муҳамедова ва Мила Романиди учлиги кирди. 1982 йилдан бошлаб ансамбль дунёнинг кўплаб мамлакатларида, жумладан, Мадагаскар, Сейшель ороллари, Танзания, Руанда, Эфиопия, Вьетнам, Лаос, Германия, Австрия, Швейцария, Афғонистонда гастроль сафарларида бўлди.

1987 йилдан Владимир Барамиков «Наво» ансамблига бошчилик қилди, 1992 йилдан эса UNA Records студияси директори ҳамда Ўзбекистонда хизмат кўрсатган артист Кумуш Раззоқованинг продюсерига айланди.

Барамиков 150 дан ортиқ ҳужжатли ва бадиий фильмлар учун оригинал мусиқалар ёзди.