Жиззахда бугун, 6 ноябрь куни атоқли давлат ва жамоат арбоби Шароф Рашидов таваллудининг 100 йиллиги доирасида унга бағишланган ҳайкалнинг очилиш маросими бўлиб ўтди, деб хабар берди ЎзА.
Маросимда Ўзбекистон Президенти Шавкат Мирзиёев Шароф Рашидовнинг халқ манфаатлари йўлидаги улкан хизматлари ҳақида нутқ сўзлади.
«Шароф Рашидов умр бўйи ўз халқига, барча соф ниятли инсонларга яхшилик қилиб, уларни улуғ мақсадлар йўлида бирлаштириб, эзгу ишларга сафарбар этиб яшади. Бу олийжаноб, донишманд ва бағрикенг инсон, қандай суронли синовларга дуч келган бўлмасин, юксак гуманистик ғояларга доимо содиқ бўлиб, халқимиз қалбида яхши ном, сўнмас хотира қолдирди. Шароф Рашидов республика раҳбари сифатида зиммасидаги улкан вазифаларга қарамасдан, ўзи бутун борлиғи билан севган адабиётга ҳамиша содиқ қолди. У ўзининг бетакрор истеъдоди билан эзгу қадриятларни тараннум этган роман ва қиссалар, шеър ва достонлар, публицистик мақолалар яратди», — деди Шавкат Мирзиёев.
Тадбирда Ўзбекистон Фанлар академияси академиги Оқил Салимов, меҳнат фахрийси Исмоил Жўрабеков, учувчи-космонавт Владимир Жонибеков, меҳнат фахрийси Қаллибек Камалов, Шароф Рашидовнинг қизи, академик Сайёра Рашидова ва бошқалар Шароф Рашидов билан боғлиқ хотиралари, у кишининг ҳаёти ва фаолияти ҳақида сўзлади.
Шароф Рашидов ҳайкалини Ўзбекистон Республикаси Президенти Шавкат Мирзиёев ва Шароф Рашидовнинг қизи Сайёра Рашидова очди.
Шароф Рашидов ҳайкали пойига гуллар қўйилди.
Изоҳ (0)