Транспорт воситаси рўйхатдан ўтказилганлиги тўғрисидаги гувоҳнома учун тўлов суммаси оширилди

Ўзбекистон ички ишлар вазири буйруғи билан рўйхатдан ўтказиш давлат рақами белгилари ва қатъий ҳисобдаги бланкалар бериш, автомототранспорт воситалари, уларнинг тиркамалари (ярим тиркамалари)ни рўйхатдан ўтказиш, қайта рўйхатдан ўтказиш, мажбурий техник кўрикдан ўтказиш, шунингдек, имтиҳонларни олишда ундириладиган тўловлар ставкаларининг айримлари ўзгартирилди ва тўлдирилди. Бу ҳақда Norma хабар бермоқда.

Транспорт воситаси рўйхатдан ўтказилганлиги тўғрисидаги, шунингдек, ҳайдовчилик гувоҳномаларини олиш учун тўлов энг кам иш ҳақининг 70 фоизи этиб белгиланди. Олдин бу сумма ЭКИҲнинг 20 фоизини ташкил этарди.

Шунингдек, мазкур ҳужжатда қўшимча ставкалар ҳам кўрсатиб ўтилган. Жумладан:

Транспорт воситаси рўйхатдан ўтказилганлиги тўғрисидаги вақтинчалик гувоҳномани олиш — ЭКИҲнинг 20 фоизи;

Автомототранспорт воситасининг рўйхатдан ўтказилганлиги тўғрисидаги яроқсиз ҳолатга келган, зарарланган ёки ўғирланган гувоҳноманинг дубликатини олиш — ЭКИҲнинг 70 фоизи;

Автомототранспорт воситасини воситаси рўйхатдан ўтказилганлиги ҳақидаги вақтинчалик гувоҳнома дубликатини олиш — ЭКИҲнинг 1 фоизи;

Янги намунадаги йўқотилган ҳайдовчилик гувоҳномаси дубликатини бериш — ЭКИҲнинг 1 баробари;

Йўқотилган эски намунадаги ҳайдовчилик гувоҳномаси ва (ёки) унинг талони ўрнига янги намунадагисини олиш — ЭКИҲнинг 1 баробари;

Яроқсиз ҳолатга келган, зарарланган ёки ўғирланган ҳайдовчилик гувоҳномасининг дубликатини олиш, жумладан, эскиси ўрнига янги намунадаги ҳайдовчилик гувоҳномаси ва (ёки) унинг талонини олиш — ЭКИҲнинг 70 фоизи;

Йўқотилган ҳайдовчилик гувоҳномаси ўрнига вақтинчалик рухсатномани олиш — ЭКИҲнинг 10 фоизи.