Германиянинг Deutsche Bahn темир йўл компанияси ўзининг ҳайдовчисиз микроавтобусини ишга туширди. Электр шаттл Бавариянинг Бад-Бирнбах шаҳрида, вокзал, шаҳар маркази ва минерал сув манбалари ўртасида ҳаракатланади, дея хабар беради «Коммерсантъ».
Микроавтобуснинг мазкур йўналишда ҳаракатланиш вақти 8 дақиқа, тезлиги соатига 15 километрни ташкил этади. Франциянинг Ligier компанияси томонидан яратилган EZ10 русумидаги микроавтобус 6 та ўриндиқ билан жиҳозланган, яна шунча киши тик туриб кетиши мумкин.
EZ10 жамоат транспорти тизимига киритилган ва оддий йўлларда ҳаракатланадиган Германиядаги биринчи ҳайдовчисиз автобус бўлади. У олдиндан дастурлаштирилган йўналишда ҳаракатланади, йўлларда тўсиқларни аниқлайдиган ва зарур бўлса тўхтайдиган сенсорлар билан жиҳозланган.
Изоҳ (0)