Еврокомиссия Мальтада журналистнинг ўлдирилишини буюртма қотиллик деб баҳолади
Еврокомиссиянинг расмий вакили Маргаритис Схинас Мальтада журналист Дафна Каруана Галициянинг ҳалок бўлиши буюртма қотилликка ўхшашини таъкидлаб, суриштирув ўтказишга ва жиноятчиларни жазолашга чақирди. Бу ҳақда «Коммерсант.ru» ёзмоқда.
«Биз Мальтада суриштирувларга ихтисослашган энг истеъдодли журналистлардан бирининг ҳалок бўлишидан ларзага келдик. Ноқулай саволлар бериш ва гуноҳларни очиш — журналистнинг асосий вазифаси, бу Европа меъёрлари ва қонунлари билан ҳимояланган бўлиб, демократиянинг асосий қадриятларини акс эттиради», — деди у Брюсселда ўтказилган брифингда.
Журналист аёлнинг ўлими ҳақида 16 октябрь куни хабар берилди. У ижарага олинган автомобилда Мальта шимолида кетаётганида ЙТҲ рўй берди. Портловчи ускуна машина ичида бўлмай, масофадан портлатилгани тахмин қилинмоқда.
