Хоразмда 77 ёшли қўшнисига ёрдам бермоқчи бўлган фуқаро уни «ЗИЛ»да босиб кетди

Хоразм вилоятининг Урганч туманида инсон ўлими билан боғлиқ бахтсиз ҳодиса юз берди, дея хабар бермоқда Хоразм вилояти Ички ишлар бошқармаси матбуот хизмати.

Хабар беришларича, Урганч туманида истиқомат қилувчи 1980 йилда туғилган М.Қурбанов 1940 йилда туғилган қўшниси Б.Тожимовнинг илтимосига кўра, 15 октябрь куни ўзининг «ЗИЛ-130» юк машинасида даладан шоли сомонини олиб келиб беришда ёрдам бермоқчи бўлган.

«Аммо ҳайдовчи сомон ортиш жараёнида орқага ҳаракатланиш пайтида эҳтиёт чораларини кўрмаганлиги боис, юк машинанинг орқа томонидан турган қўшнисини босиб ўтган. Натижада 77 ёшни қаршилаган отахон олган тан жароҳати туфайли ҳодиса жойида вафот этди», — дейилади ИИБ ахборотида.

Қайд этишларича, ҳозирда мазкур ҳолат юзасидан суриштирув ишлари олиб борилмоқда.