Москвада ўлдирилган сартарош Достон Одилхонов 17 октябрь куни Фарғонада дафн этилади

Москвада кўнгли тўлмаган мижоз томонидан ўлдириб кетилган ўзбекистонлик сартарош Достон Одилхоновнинг жасади 17 октябрь, сешанба куни ўзи туғилиб-ўсган Фарғонага етказилади, деб ёзади «Nuz.uz». Ўзбекистон фуқаросининг Москвада ўлдириб кетилгани ҳақида расмий хабар эса ҳалигача йўқ.

Достон ҳақида Ойбек Ахмедов нашрга гапириб берган. Унинг айтишича, Достоннинг оиласи Фарғона ташқарисида ночорликда кун кечиради. «Бугун Достоннинг ота-онаси яшайдиган уйга бордим. Улар жуда ночор яшашади. Ота-онасининг ягона таянчи бўлган Достон бир йил аввал Москвага ишлаш учун кетиб, пул юборишни ҳам бошлаган эди», — деди Ойбек.

Марҳумнинг онасига ўғлининг ўлими ҳақида ҳали маълум қилишмаган, уни реанимацияда деб айтишган. «Шундоқ ҳам у яқинда инсультни бошидан кечирган. Отаси ҳам хаста, зўрға оёқда турибди. Билмадим, улар ҳаётларидаги энг қимматли нарсадан ажралгач, буёғига қандай яшашаркан», — деди Ойбек.

Достоннинг миннатдор мижозлари ўша куниёқ марҳумнинг жасадини Ўзбекистонга жўнатиб юбориш учун пул йиғишни бошлади. Кейинроқ Facebook фойдаланувчилари ҳам марҳумнинг оиласи учун маблағ тўплашни бошлади.

«Бу воқеага бееътибор бўлмаганларни маблағ йиғишга чақираман. Йигит Охунбобоев даҳасидаги Ал Хоразмий кўчасида яшарди, Достоннинг отасининг исми Рустам ака. Дўстлар, оила ночор, шунинг учун ҳар қандай ёрдамингиз керакли. Достонни эртага (17 октябрда) Москвадан кечки рейс билан олиб келишади. Маблағ йиғиш билан Наталя Вальеревна шуғулланмоқда», — деб ёзди Жасурбек Неъматов Facebook’даги гуруҳлардан бирида.

Нашрга маълум бўлишича, Достонни 17 октябрь куни кечки пайт дафн қилишни режалаштиришмоқда.

Эслатиб ўтамиз, Янги Москвадаги сартарошхона раҳбарияти Достоннинг шахси ва ўша машъум кун тафсилотлари ҳақида гапириб берди.