Англиянинг Шарқий Суссекс графлигидаги тик жарлик ёқасида суратга тушмоқчи бўлган Жанубий кореялик талаба қиз пастга тушиб кетди ва ҳалок бўлди. Бу ҳақда The Daily Mail хабар бермоқда.
23 ёшли Хе Вон Ким Буюк Британияга инглиз тили даражасини мустаҳкамлаш учун келган эди. У Севен-Систерс номли миллий боғга йўл олган. Бу боғда бир қанча тик жарликлар жойлашган бўлиб, улар сайёҳларни ўзига жалб қилади.
Қиз нотаниш кишидан унинг жар ёқасида сакрашини суратга олишни сўраган. Бироқ қиз мувозанат сақлай олмаган ва 60 метрли баландликдан тушиб кетган. Кейинроқ полиция қизнинг телефонидан жарлик ёқасида сакраётгани акс этган олтита расмни топган.
Қизнинг жасади жарликнинг тубида топилган. Шифокорларнинг сўзларига кўра, у бошидан олган кучли жароҳат сабабли вафот этган.
Нашрнинг қайд этишича, ҳар йили Севен-Систерсга 350 минг киши келади. Огоҳлантирувчи белгиларга ва хавфга қарамасдан сайёҳлар суратга тушиш учун жарлик ёқасига боради.
Изоҳ (0)