Юридик коллежда пичоқбозлик уюштирган ўқувчилар илгари жиноят ишлари иштирокчилари бўлган

Тошкент юридик коллежининг пичоқбозлик уюштирган ўқувчилари ички рўйхатда турган ва бир қатор жиноий ишлар иштирокчиси бўлган, деб ёзади «Nuz.uz».

Нашр аниқлаштиришича, марҳум Асадбек Парпибоевга нисбатан шу йилнинг сентябрида Жиноят кодексининг қасддан енгил тан жароҳатлари бериш моддасида кўзда тутилган жиноят белгилари бўйича жиноят иши қўзғатилган.

Қуролли муштлашувдаги иккинчи жабрланувчи — Раҳматилла Ёрқориев эса безорилик ҳолати бўйича Жиноят кодексининг 277-моддаси бўйича бошқа бир жиноят иши иштирокчиси бўлган. Айни пайтда иш Чилонзор туман судида кўриб чиқилмоқда.

Ўз курсдошларини пичоқ билан яралаган Саидкамрон Саидвалиев ҳеч қандай жиноий иш иштирокчиси бўлмаган. Аммо уларнинг учаласи ҳам маълум бир айблари учун коллежнинг ички рўйхатига киритилган.

Эслатиб ўтамиз, жорий йилнинг 6 октябрь куни Тошкент юридик коллежида ўқийдиган 3-курс талабалари ўртасида келишмовчилик содир бўлган, оқибатда Саидкамрон Саидвоҳидов ўзининг икки нафар курсдошига пичоқ орқали тан жароҳати етказган. Улардан бири — Асадбек Парпибоев қон кетиши оқибатида шифохонада вафот этган. Жабрланувчиларнинг иккинчиси — Раҳматилла Ёрқориевга эса зарур тиббий ёрдам кўрсатилиб, уйига жавоб бериб юборилган. Ҳолат юзасидан Жиноят кодексининг 104-моддаси 3-қисми «д» банди («жабрланувчининг ўлишига сабаб бўлган қасддан баданга оғир шикаст етказиш») аломатлари билан жиноят иши қўзғатилган, тергов олиб борилмоқда.