Мьянма гўзаллик танловининг 19 ёшли ғолибаси Шви Ин Си роҳинжа мусулмон-жангариларини террор ва зўравонликда айблаганидан сўнг унвонидан айрилганини маълум қилди. Бу ҳақда «РИА Новости» хабар бермоқда.
Фото: «РИА Новости»
Ўтган ҳафтада Шви Ин Си ўзининг Facebook’даги саҳифасида роҳинжа жангарилари «бегуноҳ фуқароларга нисбатан зўравонлик қилаётгани» ҳақида сўзлагани акс этган роликни жойлаштирган эди.
Гўзаллик танлови ташкилотчилари Швидан тожни олиб қўйганини тасдиқлаган, бироқ бу ҳолатнинг видеоролик билан боғлиқлигини рад этмоқда.
Гўёки Шви Ин Си ўзини танлов иштирокчиларига хос бўлмаган тарзда тутиб, у билан тузилган шартномани бузган.
Хусусан, у олий маълумоти борлигини исботловчи ҳужжатни тақдим этишдан бош тортган ва Вьетнамга режалаштирилган сафарга тайёргарлик кўрмаган.
Роҳинжа мусулмонлари яшайдиган Мьянма ғарбида жойлашган Ракхайн вилоятидаги вазият 25 август куни «Аракан роҳинжаларини қутқариш армияси» ҳаракатининг юзлаб жангарилари полициянинг 30 та таянч пунктига ҳужум қилганидан сўнг кескинлашган эди.
Ҳудуддаги зўравонликлар туфайли 414 киши ҳалок бўлди, қўшни Бангладеш Республикаси эса 500 минг нафар қочоқ-роҳинжаларни қабул қилди.
