GM Uzbekistan томонидан ишлаб чиқарилган автомобилларни Россия бозорида сотиш билан шуғулланувчи Ravon Motors Rus футбол бўйича Россия миллий терма жамоаси ҳомийсига айланди. Бу ҳақда компания сайтида маълумот берилди.
Шартнома 1 октябрдан расман кучга кирган бўлиб, у ЖЧ—2018 стартига қадар амалда бўлиши айтилган. Бу борада Россия Футбол Уюшмаси Ravon брендини реклама қилишни Жанубий Корея ва Эронга қарши халқаро ўртоқлик ўйинларидан бошлайди.
Ўзбекистон миллий терма жамоасини ЖЧ саралашида қолдириб кетганлардан Жанубий Корея 7 октябрь куни Россияга қарши саф торца, орадан уч кун ўтиб, аниқроғи, 10 октябрь куни форслар Россия яшил майдонларида кўриниш беради.
Биз Россия Футбол Уюшмаси билан ҳамкорлик қила бошлаганимиздан хурсандмиз. Мамлакат бош жамоаси прогресс сари интилмоқда, таркибдаги асосий позицияларни секин-асталик билан ёшлар тўлдирмоқда. Буни кўрмай қолишнинг шунчаки иложи йўқ.Ўзаро ҳамкорлик доирасидан спорт тадбирларини биргаликда ўтказиш, Россия футболини қўллаб-қувватлаш, болалар учун машҳур футболчилар иштирокида мастер-класс ўтказиш кабилар ўрин олган.Мен ишонаманки, Россия термаси Жаҳон Чемпионатига қадар бўлган йўл давомида номдор термаларга қарши ўзини ёрқин томондан намойиш қила олади ва илк бор Россияда ўтаётган мундиалда ҳам муносиб тўп суради. Умид қиламизки, бу ҳамкорлик Ravon маркасига бўлган эътиборни оширади, спортга чанқоқ бўлган ёшлар ҳамда доимо ҳаракатдаги одамлар қизиқишларига сабаб бўлади.
Шароф Ашуров, Ravon Motors Rus бош директори
Россия Футбол Иттифоқи Ravon Motors Rus компаниясини миллий терма жамоа ҳомийларидан ташкил топган аҳил оилада кўришдан хурсанд. Ишонаманки, ҳамкорлик узоқ давом этади ва икки томонлама фойдали бўлади.Александр Алаев, РФУ бош директори
Изоҳ (0)