БМТ: ИШИД жангарилари Ироқ ва Сурияни тарк этишга уринмоқда

ИШИД террорчи гуруҳи жангарилари Ироқ ва Сурияни тарк этишга ҳаракат қилмоқда, улар пул маблағларини бошқа минтақалар, жумладан, Жануби-Шарқий Осиёга ўтказмоқда. Бу ҳақда БМТ Хавфсизлик Кенгашининг аксилтеррор операциялари бўйича қўмитаси раиси Қайрат Умаров баёнот берди, деб хабар қилади «ТАСС».

«Чет эллик жангарилар Ироқ ва Сурияни репатриантлар сифатида тарк этмоқчи, улар жаҳон ҳамжамиятига янги таҳдидлар яратмоқда», — деди Умаров Краснодарда ўтаётган Россия Федерал хавфсизлик хизмати ҳамкорлари — чет эл махсус хизматлари, хавфсизлик органлари ва ҳуқуқ-тартибот идоралари раҳбарлари йиғилишида.

Қўмитанинг мониторинг гуруҳи маълумотларига суянган ҳолда БМТ амалдори гуруҳ минтақада мағлубиятга учрашини билиб, бошқа зоналарда фаолиятини давом эттиришга тайёрланаётганини таъкидлаб ўтди.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.