Қоҳира шаҳридан 45 километр шарқда жойлашган ва айни вақтда қурилиши жадал кетаётган Мисрнинг янги маъмурий маркази 2018 йилнинг охирида ҳукумат муассасаларини қабул қилишга тайёр бўлади. Бу ҳақда мамлакат бош вазири Шариф Исмоилнинг баёнотига таяниб, «ТАСС» хабар берди.
Вазирликлар, ҳукумат муассасалари ва президент девони у ерга 2018 йилнинг охирида кўчиб ўтиш мумкин бўлади. Мамлакат раҳбарияти аҳолиси 20 миллион кишидан ошган ва тирбандликлардан бўғилаётган асосий шаҳарни шу тариқа максимал даражада енгиллаштиришни кўзламоқда. Янги маъмурий пойтахтнинг қурилиши режаси ҳақида 2015 йилнинг март ойида эълон қилинган.
Сувайш каналигача чўзиладиган ва дунёнинг таниқли бизнес марказлари билан рақобат қилиши мумкин бўлган Янги Қоҳиранинг лойиҳаси 45 миллиард долларга баҳоланмоқда. У 700 квадрат километр майдонга жойлашади. Ҳозирги пойтахт маъмурий пойтахт билан темир йўл тармоқлари орқали боғланади. Маъмурий пойтахтнинг ўз аэропорти ҳамда Яқин Шарқдаги энг йирик кўнгилочар хиёбон қурилади. Шунингдек, 45 мингта номерли осмонўпар меҳмонхоналар ва 25 та аҳоли мавзеси қад ростлайди.
Бу йирик лойиҳанинг амалга оширилиши пойтахтдаги беш миллион кишини кўчириб ўтказишга имкон беради. Бунда янги пойтахтдаги аҳолининг катта қисмини мансабдорлар ташкил қилади. У ердаги турар жойларни ҳозирнинг ўзида сотиб олиш мумкин. Аҳолининг биринчи оқими 2018 йилнинг ўртасида кутилмоқда.
Изоҳ (0)