Туркия расмийлари француз журналисти Лу Бюрони озод қилди

Туркия расмийлари июлда қўлга олинган француз журналисти Лу Бюрони озод қилди, яқин орада у юртига жўнайди. Бу ҳақда унинг адвокати Мартель Прадель маълум қилди, дея хабар беради «РИА Новости».

«Биз журналист Лу Бюро озод этилганини маълум қиламиз. У яқин орада Туркиядан чиқариб юборилади. Шу билан бирга, Ширноқ суди ишни ёпгани йўқ ва курашни давом эттиришга тўғри келади», — дея ёзув қолдирди Прадель Twitter’даги саҳифасида.

Журналистни озод қилиш имконияти Франция ташқи ишлар вазири Жан-Ив Ле Дрианнинг Туркия президенти Ражаб Тоййиб Эрдўғон билан музокараларидан сўнг туғилгани тахмин қилинмоқда.

Маълумот учун, TV5 Monde, Arte ва Slate билан ҳамкорлик қилган француз мустақил журналисти Лу Бюро 26 июлда Ироқ ва Туркия чегарасида қўлга олинганди.