Жаҳондаги барча асосий криптовалюталар курслари тушиб кетди. Энг машҳур рақамли валюта — Bitcoin 3 минг долларга баҳоланмоқда, деб хабар бермоқда «Корреспондент.net».
Ўтган ҳафтадан буён жаҳон матбуотида Хитойда барча ICO (Initial Coin Offering — тангаларни бирламчи жойлаштириш, янги технологик лойиҳаларга инвестиция жалб қилиш шакли) тақиқлангани ҳақида хабарлар тарқалмоқда. Бунинг натижасида бозордаги саросима криптовалюталар қийматига таъсир кўрсатди.
Бундан ташқари, BitKan биржаси сотувларни тўхтатди. Хитойнинг энг йирик криптовалюта биржаси — BTCC 30 сентябрдан платформадаги сотувлар тўхтатилганини расман маълум қилди.
Воқеаларнинг бу ривожи криптовалюталарга салбий таъсир кўрсатди. 15 сентябрь ҳолатига кўра Bitcoin курси 3075 долларга тушиб кетди. Шу тариқа, икки кун ичида криптовалюта қиймати қарийб 900 долларга (22 фоизга) тушиб кетди. Агар 2 сентябрдаги рекорд қийматдан (5012 доллар) ҳисобланса, тушиш 40 фоизни ташкил этади.
Яна бир машҳур криптовалюта — Ethereum қиймати 13 сентябрь куни 270 долларга тушган бўлса, бугун бу кўрсаткич 217 долларни ташкил қилмоқда (икки кунда 20 фоиз).
Изоҳ (0)