Монако адлия вазири Филипп Нармино россиялик миллиардер Дмитрий Риболовлев ва швейцариялик арт-дилер Ив Бувье ўртасидаги суд ишига таъсир ўтказиши мумкинлиги ҳақидаги хабарлардан сўнг истеъфо берди. Бу ҳақда «РБК» маълум қилди.
«Менга қарши шахсий айбловлар ва суд органларининг таъқиблари шундай қарорга келишимга сабаб бўлди. Лавозимимни тарк этишим хотиржамлик билан амалга оширилиши лозим бўлган Монако судлови манфаатларига мос келади», — таъкидлади Нармино.
Парижда чоп этиладиган Le Monde нашри 14 сентябрь куни Нармино ва Риболовлев дўстона алоқаларда эканлиги ёритилган материални эълон қилди. Газетага кўра, миллиардер 2015 йил бошида вазир ва унинг турмуш ўртоғини Швейцариянинг Гштад қишлоғидаги уйига таклиф этган.
Жорий йил бошида эса миллиардер ва унинг шахсий коллекцияси учун санъат асарлари етказиб берган арт-дилер Ив Бувье ўртасида суд тортишуви бошланди. Риболовлев Бувьени фирибгарликда ва сотаётган картиналари нархини асоссиз оширганликда айблади. Бу миллиардер бир неча юз миллион еврони бой беришига олиб келди.
Изоҳ (0)